គម្រោងស្ដីអំពី ការចូលរួមទប់ស្កាត់អំពើហិង្សាយេនឌ័រនៅកម្ពុជា

សេចក្ដីផ្ដើម

អង្គការវិទ្យាស្ថានបើកទូលាយបានប្រតិបត្តិគម្រោងមួយស្ដីអំពី "ការចូលរួមទប់ស្កាត់អំពើហិង្សាយេនឌ័រនៅកម្ពុជា "។ គម្រោងនេះត្រូវបានឧបត្ថម្ភដោយ កម្មវិធីស៊ុយអែតសម្រាប់ ការអភិវឌ្ឍន៍ ICT នៅក្នុងតំបន់កំពុងអភិវឌ្ឍន៍ ហៅកាត់ថា SPIDER (The Swedish Program for ICT in Developing Regions) ។ គម្រោងនេះអាចទទួលស្គាល់ជាការសិក្សា ដំបូងទៅលើការពិនិត្យ យន្តការដោះស្រាយ និងទប់ស្កាត់ របស់រាជរដ្ឋាភិបាលលើអំពើហិង្សាយេនឌ័រ។ ម្យ៉ាងវិញទៀតការសិក្សានេះ បានផ្ដោតផងដែរទៅលើការប្រមូលព័ត៌មានអំពើហិង្សាគ្រប់ ប្រភេទក្នុងឆ្ន឵˚២០១១ ដើម្បីចងក្រងជាស្ថិតិ ស្តង់ដារជារួមមួយសម្រាប់បម្រើតម្រូវការជាទូទៅ។ អំពើហិង្សាគ្រប់ប្រភេទមាន ហិង្សាលើរូបរាងកាយ ហិង្សាលើផ្នែក សតិអារម្មណ៍ ហិង្សាលើផ្នែកសេដ្ឋកិច្ច ហិង្សាលើផ្លូវភេទ រឺការបៀតបៀនផ្លូវភេទ។

នៅថ្ងៃសុក្រ ទី៣១ ខែសីហា កន្លងទៅនេះ អង្គការវិទ្យាស្ថានបើកទូលាយ បានធ្វើកិច្ចប្រជុំលើកទីមួយអំពីការ ពិភាក្សាលើកម្រងសំណួរអំពើហិង្សាលើយេនឌ័រ។ កិច្ចប្រជុំនេះមានការចូលរួមពីសមាជិកក្រុមប្រឹក្សា ឃុំ-សង្កាត់ ដែលជាតំណាងមកពីសង្កាត់ ទីក្រុងភ្នំពេញ និងតំណាងឃុំពីខេត្តសៀមរាប ខេត្តកំពង់ធំ ខេត្តបាត់ដំបង។ គោលបំណងរបស់ការពិភាក្សានេះគឺដើម្បីប្រមូលផ្តុំគំនិត ក្នុងការស្ថាបនា ទៅលើសំណួរ និមួយៗ។

គោលបំណងរបស់គម្រោង

គម្រោងស្ដីអំពីការចូលរួមទប់ស្កាត់អំពើហិង្សាយេនឌ័រនៅកម្ពុជានឹង ផ្ដល់ជូនសមាជិកក្រុមប្រឹក្សាឃុំ-សង្កាត់ និងអង្គការស្ត្រីមួយចំនួននៅកម្ពុជានូវចំណេះដឹងប្រើប្រាស់ បច្ចេកវិទ្យាព័ត៌មាន និងសារគមនាគមន៍ ដើម្បីពិនិត្យការទប់ស្កាត់ និងការឆ្លើយតបទៅលើអំពើហិង្សាលើស្ត្រីនៅកម្ពុជា។ ម្យ៉ាងវិញទៀត គម្រោងក៏បានផ្ដោតទៅលើការប្រមូលផ្ដុំ និងវិភាគទិន្នន័យដែលប្រមូលបានពីការសិក្សាស្រាវជ្រាវតាមរយៈកម្រង សំណួរដែលពាក់ព័ន្ធទៅលើការពិនិត្យលើយន្តការ និងគណនីភាពរបស់រាជរដ្ឋាភិបាលសម្រាប់ការទប់ស្កាត់អំពើហិង្សា យេនឌ័រនេះ។ ការពង្រឹងសមត្ថភាពដល់សមាជិកក្រុមប្រឹក្សាឃុំ-សង្កាត់ និងអង្គការសិទ្ធិស្ត្រី ក្នុងការប្រើប្រាស់បច្ចេកវិទ្យាព័ត៌មាន និងសារគមនាគមន៍ សម្រាប់ពិនិត្យការអនុវត្តផែនការសកម្មភាពជាតិដើម្បីបញ្ឈប់ហិង្សា លើស្ត្រី បានឆ្លុះបញ្ចាំងការចូលរួមសកម្មភាព និងជាមធ្យោបាយមួយដែលនាំឆ្ពោះទៅសម្រេចបានគោលដៅអភិវឌ្ឍរបស់ ប្រទេស ក៏ដូចជាគោលដៅអភិវឌ្ឍសហស្សវត្ស ។ ការយល់ដឹងទូលំទូលាយនៃការកើតមានឡើងនៃអំពើហិង្សាលើស្ត្រី និងវត្តមាននៃយន្តការដោះស្រាយ ឆ្លើយតបរបស់រាជរដ្ឋាភិបាលទៅលើបញ្ហានេះ ជាចំណុចវិជ្ជមានមួយដែលផ្ដល់ឱកាសឲ្យមានការពិនត្យជាសាធារណៈ ទៅលើយន្តការទប់ស្កាត់អំពើហិង្សាយេនឌ័រនៅកម្ពុជា។

ដៃគូសហការរបស់គម្រោង

អង្គការវិទ្យាស្ថានបើកទូលាយមានកិច្ចសហប្រតិបត្តិការជាមួយអង្គការ ផ្សេងៗមួយចំនួនក្នុងការអនុវត្តគម្រោងនេះ ។ APC (Association for Progressive Communication) ជាអ្នកដឹកនាំគម្រោង ចំណែកឯវិទ្យាស្ថានបើកទូលាយជាអង្គការប្រតិបត្តិគម្រោងដែលទទួល ខុសត្រូវក្នុងការប្រមូលទិន្នន័យ និងធ្វើការបណ្ដុះបណ្ដាលដោយសហការជាមួយដៃគូក្នុងស្រុក ដូចជា សម្ព័ន្ធភាពជាតិឃុំ-សង្កាត់ (NLC/S) ដែលជាធនធានដ៏ប្រសើរក្នុងការប្រមូលព័ត៌មានអំពើហិង្សាយេនឌ័រ នៅក្នុងឃុំ-សង្កាត់។ លើសពីនេះទៅទៀត យើងក៏បានធ្វើការជាមួយអង្គការពាក់ព័ន្ធនឹងបញ្ហាស្ត្រីមួយចំនួន ក្នុងការអនុវត្តគម្រោងនេះ ដូចជា UNWOMEN, EWMI, GIZ, InSTEED, PyD, GAD/C និង ECPAT/CAMBODIA ។

ធនធានបណ្ដាញរបស់អង្គការ

អង្គការវិទ្យាស្ថានបើកទូលាយ គឺជាសមាជិកមួយនៃបណ្ដាញ ICT សម្រាប់ការអភិវឌ្ឍ (ICT4D) នៅកម្ពុជា និង ICT សម្រាប់ប្រជាធិបតេយ្យ (ICT4Democracy) ដែលមានសមាជិកដូចជា អង្គការវិទ្យាស្ថានបើកទូលាយ (OI), SPIDER, EWMI, InSTEED, មណ្ឌលព័ត៌មានស្ត្រី (WMC) និងអង្គការ APC ។ បណ្ដាញទាំងនេះផ្ដល់ឲ្យយើងនូវមធ្យោបាយដើម្បីទំនាក់ទំនងដៃគូ ពាក់ព័ន្ធដ៏ប៉ិនប្រសព្វ ដែលអាចផ្ដល់ព័ត៌មានបានប្រសើរ និងគួរឲ្យចាប់អារម្មណ៍នៅក្នុងតំបន់ ។ យើងបានប្រើប្រាស់បណ្ដាញនេះសម្រាប់ជួយផ្ដល់មតិយោបល់ និងមតិឆ្លើយតបចំពោះសេចក្ដីព្រាងនៃកម្រងសំណួរស្ដីពីហិង្សា យេនឌ័រ (GBV) ។

វិទ្យាស្ថានបើកទូលាយក៏កំពុងសហការជាមួយអង្គការ SPIDER លើគម្រោងមួយចំនួនរបស់ SPIDER ដូចជា ៖

១.ការពិភាក្សាអំពីលទ្ធិប្រជាធិបតេយ្យ
២.យន្តការ និងគណនីភាពរបស់រដ្ឋាភិបាលសម្រាប់ការទប់ស្កាត់អំពើហិង្សាយេនឌ័រនៅកម្ពុជា ។

រូបភាពសិក្ខាសាលាស្ដីពីការធ្វើកម្រងសំណួរស្ដីអំពីយន្តការទប់ស្កាត់អំពើហិង្សាយេនឌ័ររបស់រាជរដ្ឋាភិបាល

មតិស្វាគមន៍ របស់លោកស្រី ជឹម ម៉ាណាវី នាយិកាអង្គការវិទ្យាស្ថានបើកទូលាយ ក្នុងកិច្ចប្រជុំអំពីកម្រងសំណួរ ថ្ងៃ៣១ សីហា ២០១២ រូបថត ៖ វិទ្យាស្ថានបើកទូលាយ

ចំណាប់អារម្មណ៍ស្វាគមន៍របស់តំណាងសម្ព័ន្ធភាពជាតិឃុំ/សង្កាត់ ក្នុងកិច្ចប្រជុំអំពីកម្រងសំណួរ ថ្ងៃ៣១ សីហា ២០១២ រូបថត ៖ វិទ្យាស្ថានបើកទូលាយ

ការប្រជុំពិភាក្សាលើកទីមួយលើកម្រងសំណួរ អំពើហិង្សាយេនឌ៍រ ៣១ សីហា ២០១២ រូបថត ៖ វិទ្យាស្ថានបើកទូលាយ
ការផ្ដល់យោបល់ពី NGO លើកម្រងសំណួរ ក្នុងកិច្ចប្រជុំថ្ងៃ ៣១ សីហា ២០១២ រូបថត ៖ វិទ្យាស្ថានបើកទូលាយ

ការផ្ដល់យោបល់ពីសមាជិកឃុំ/សង្កាត់លើកម្រងសំណួរ ក្នុងកិច្ចប្រជុំថ្ងៃ ៣១ សីហា ២០១២ រូបថត ៖ វិទ្យាស្ថានបើកទូលាយ
បទបង្ហាញអំពីគម្រោងដោយប្រធានគម្រោង ក្នុងកិច្ចប្រជុំថ្ងៃ ៣១ សីហា ២០១២ រូបថត ៖ វិទ្យាស្ថានបើកទូលាយ