សេចក្ដីប្រកាសព័ត៌មាន ៖សន្និសីទថ្នាក់ជាតិលើកទី៣ ស្ដីអំពីសមភាពយេនឌ័រនៅក្នុងរបៀបវារៈអភិវឌ្ឍន៍ថ្មី

សេចក្ដីប្រកាសព័ត៌មាន

សន្និសីទថ្នាក់ជាតិលើកទី៣ ស្ដីអំពីសមភាពយេនឌ័រនៅក្នុងរបៀបវារៈអភិវឌ្ឍន៍ថ្មី

១១-១២ ខែកុម្ភៈ ឆ្នាំ២០១៦

ភ្នំពេញ ថ្ងៃ ទី ០៩ ខែកុម្ភៈ ឆ្នាំ ២០១៦

ក្រោមការឧបត្ថម្ភថវិកាពីអង្គការUN Womenប្រចាំប្រទេសកម្ពុជា និងរៀបចំដោយអង្គការវិទ្យាស្ថានបើកទូលាយ សន្និសីទថ្នាក់ជាតិស្ដីអំពី "គោលដៅអភិវឌ្ឍន៍ប្រកបដោយចីរភាព៖ការធ្វើឲ្យគោលដៅអភិវឌ្ឍន៍ប្រកបដោយចីរភាពដំណើរការសម្រាប់ស្ត្រីនិងក្មេងស្រីនៅប្រទេសកម្ពុជា" នឹងពិភាក្សាអំពីសមភាពយេនឌ័រ និងការផ្ដល់ភាពអង់អាចដល់ស្ត្រីនៅក្នុងរបៀបវារៈនៃការអភិវឌ្ឍថ្មី។ សន្និសីទនឹងរួមចំណែកដល់ការធ្វើមូលដ្ឋានីយកម្មដំណើរការគោលដៅអភិវឌ្ឍប្រកបដោយចីរភាព ដោយផ្ដោតសំខាន់លើគោលដៅទី៥ ដែលជាគោលដៅតែមួយសង្កត់ធ្ងន់លើឧបសគ្គជារចនាសម្ព័ន្ធក្នុងការផ្ដល់ភាពអង់អាចដល់ស្ត្រី។

ដើម្បីទទួលបាននូវពិភពលោកមួយដែលមានភាពយុត្តិធម៌ និងសមធម៌ច្រើនជាងនោះ «ការផ្ដល់ភាពអង់អាចពេញលេញដល់ស្ត្រីគ្រប់ៗគ្នា គឺជាលក្ខខ័ណ្ឌដំបូង ។ ប្រការនេះបានសឱ្យឃើញតាមរយៈការដាក់បញ្ចូលទិដ្ឋភាពស៊ីជម្រៅស្ដីពីសមភាពយេនឌ័រនៅគ្រប់គោលដៅទាំង១៧ នៃគោលដៅអភិវឌ្ឍន៍ប្រកបដោយចីរភាព» នេះបើតាមប្រសាសន៍របស់លោកស្រី វេននីគូស៊ូម៉ា តំណាងប្រចាំប្រទេសកម្ពុជារបស់អង្គការ UN Women។

ទោះបីជាមានការរីកចម្រើនក៏ដោយ ក៏ប្រទេសកម្ពុជាត្រូវការផ្លូវមួយវែងឆ្ងាយដើម្បីឆ្ពោះទៅរកសមភាពយេនឌ័រ។ នៅក្នុងរដ្ឋសភា មានតំណាងស្ត្រីត្រឹមតែ ២០ភាគរយប៉ុណ្ណោះ។ ការសិក្សាចុងក្រោយរបស់អង្គការUN Women នៅកម្ពុជាឆ្នាំ២០១៥ អំពីអំពើហិង្សាលើដៃគូ បង្ហាញថាស្ត្រីម្នាក់ក្នុងចំណោមស្រ្តី៥នាក់ក្នុងប្រទេសកម្ពុជាទទួលរងនូវអំពើហិង្សាលើរាងកាយ និង/ឬ ហិង្សាផ្លូវភេទដោយដៃគូ។ លើសពីនេះទៀត ស្រី្ត៧០ភាគរយ ធ្វើការងារដែលមានភាពងាយរងគ្រោះ។

ការកំណត់គោលដៅថ្មីមានលក្ខណៈសំខាន់និងទូលំទូលាយជាងគោលដៅអភិវឌ្ឍន៍សហស្សវត្ស។ គោលដៅថ្មី បានកំណត់ចំណុចដៅជាក់លាក់ និងសូចនាករស្ដីពីអំពើហិង្សាលើស្ត្រី ស្ត្រី សន្តិភាព និងសន្តិសុខ សុខភាពបន្តពូជ សិទ្ធិមនុស្ស ការងារថែទាំឥតប្រាក់កម្រៃ និងការងារតាមផ្ទះ។

« គោលដៅអភិវឌ្ឍន៍ប្រកបដោយចីរភាពបាន ផ្ដល់នូវឱកាសជាគន្លឹះក្នុងការធ្វើឲ្យមានសមភាពយេនឌ័រ ហើយជាបញ្ហាចម្បងនៃរបៀបវារៈអភិវឌ្ឍន៍របស់កម្ពុជា ទាំងទស្សនៈវិស័យរបស់គោលដៅ ហើយក៏ជាជាមធ្យោបាយដ៏មានសក្ដានុភាពក្នុងការអភិវឌ្ឍន៍ប្រកបដោយចីរភាព» នេះជាប្រសាសន៍របស់លោកស្រី វេននី គូស៊ូម៉ា តំណាងប្រចាំប្រទេសកម្ពុជារបស់អង្គការ UN Women។

សន្និសីទនឹងមានការចូលរួមពីវាគ្មិនកិត្តិយសសំខាន់ៗដែលជាតំណាងមកពីស្ថាប័នរាជរដ្ឋាភិបាលដែលពាក់ព័ន្ធ សង្គមស៊ីវិល និងដៃគូរអភិវឌ្ឍ។ វាគ្មិននឹងចែករំលែកបទពិសោធន៍របស់ពួកគេអំពីការអនុវត្តគោលដៅអភិវឌ្ឍប្រកបដោយចីរភាព និងទស្សនៈយល់ឃើញរបស់ពួកគេចំពោះគោលដៅអភិវឌ្ឍប្រកបដោយចីរភាព ជាពិសេសនៅលើគោលដៅទី៥ ក្នុងបរិបទប្រទេសកម្ពុជា។

បន្ថែមពីនេះទៀត នឹងមានការពិភាក្សាពេញអង្គរវាងវាគ្មិនសំខាន់ៗ និងអ្នកចូលរួម លើប្រធានបទរួមមាន៖ ក្របខ័ណ្ឌអភិវឌ្ឍន៍ថ្មី ការងារថែទាំឥតប្រាក់កម្រៃ និងការងារតាមផ្ទះ ការបញ្ជ្រាបយេនឌ័រ នៅគ្រប់គោលដៅអភិវឌ្ឍន៍ប្រកបដោយចីរភាពទាំងអស់ គោលនយោបាយនិងច្បាប់ នារីរតនៈទី៤ និងការលើកកម្ពស់សិទ្ធិស្ត្រី។ ការពិភាក្សាក៏ផ្ដោតទៅលើការទទួលបាន និងការគ្រប់គ្រងធនធានសេដ្ឋកិច្ច សមភាពយេនឌ័រនិងការផ្ដល់ភាពអង់អាចដល់ស្ត្រីនៅក្នុងគ្រឹះស្ថានសិក្សា ការស្វែងរកការគាំទ្រគោលដៅអភិវឌ្ឍប្រកបដោយចីរភាព សុខភាពបន្តពូជ និងសិទ្ធិបន្តពូជ ដូចដែលបានលើកឡើងក្នុងរបៀបវារៈអភិវឌ្ឍថ្មី។

«ដើម្បីធានាឲ្យមាននិរន្តរភាពនៃសមភាពយេនឌ័រនៅកម្ពុជា ការរួមសកម្មភាពពីស្ថាប័នរដ្ឋាភិបាល និង សង្គមស៊ីវិលគឺជាការចាំបាច់។ សង្គមស៊ីវិលមានតួនាទីយ៉ាងសំខាន់ក្នុងការអភិវឌ្ឍន៍សង្គម និងចូលរួមក្នុងការបំពេញនូវផ្នែកចន្លោះប្រហោងក្នុងការអនុវត្តន៍សមភាពយេនឌ័រនៅកម្ពុជា» នេះជាប្រសាសន៍របស់លោកស្រី ជីម ម៉ាណាវី នាយិកាប្រតិបត្តិអង្គការវិទ្យាស្ថានបើកទូលាយ ។

« សង្គមស៊ីវិលនៅកម្ពុជាបានប្ដេជ្ញាចិត្តក្នុងការធានាឲ្យមានភាពរីកចម្រើនទៅមុខនៅក្នុងការអនុវត្តគោលដៅអភិវឌ្ឍន៍ប្រកបចីរភាព ជាពិសេសគឺធានាថារាល់ទិដ្ឋភាពសមភាពយេនឌ័រនឹងត្រូវបានបញ្ជ្រាបនៅក្នុងបរិបទកម្ពុជា។ ឥឡូវនេះវាគឺជាពេលវេលាសម្រាប់គិតរួមគ្នា ពីរបៀបដែលធ្វើឲ្យដំណើរការអភិវឌ្ឍន៍ថ្មីផ្ដល់ប្រយោជន៍រួមដល់ស្ត្រីកម្ពុជា» នេះជាប្រសាសន៍របស់លោកស្រី ជីម ម៉ាណាវី នាយិកាប្រតិបត្តិអង្គការវិទ្យាស្ថានបើកទូលាយ

សន្និសីទនេះរំពឹងថានឹងមានអ្នកចូលរួមប្រមាណ ១៥០នាក់ មកពីស្ថាប័នរាជរដ្ឋាភិបាល សង្គមស៊ីវិល វិស័យឯកជន និងគ្រឹះស្ថានសិក្សាអប់រំ។ សន្និសីទក៏បានអញ្ជើញអ្នកសារព័ត៌មានចូលរួមផងដែរ។

សន្និសីទនឹងប្រព្រឹត្តនៅសណ្ឋាគារកំាបូឌីយ៉ាណា ចាប់ផ្ដើមចុះឈ្មោះនៅ ម៉ោង ៨:០០ព្រឹក នាថ្ងៃទី១១ ខែកុម្ភៈ និងបញ្ចប់នៅវេលាម៉ោង ១២:០០រសៀល ថ្ងៃទី១២ ខែកុម្ភៈ ឆ្នាំ២០១៦។

សេចក្ដីប្រកាសព័ត៌មានរួមគ្នាចេញដោយអង្គការវិទ្យាស្ថានបើកទូលាយ និងអង្គការ UN Women ប្រចាំប្រទេសកម្ពុជា។

សម្រាប់ព័ត៌មានបន្ថែម សូមទំនាក់ទំនង

លោក អ៊ុយ សារ៉េត អ្នកគ្រប់គ្រងកម្មវិធី អ៊ីមែល៖ uysareth@gmail.com. ទូរស័ព្ទ: ០៩២ ៧៥៩ ៧៦៩

Ms. Mariken Bruusgaard Haritz មន្ត្រីទំនាក់ទំនង អង្គការUN Women កម្ពុជា

អ៊ីមែល៖ mariken.harbitz@unwomen.org. ទូរស័ព្ទ: ០១២ ២១០ ៣២៥

ទាញយកសេចក្ដីប្រកាស ជា ភាសាខ្មែរ English

ភាសា កម្ពុជា