គម្រោងកម្ពុជាប្រើទូរស័ព្ទជាដំណោះស្រាយសម្រាប់ការអភិវឌ្ឍ ជាប់ចំណាត់ថ្នាក់ល្អបំផុតក្នុងតំបន់អាស៊ី

ទីក្រុងបាងកក ប្រទេសថៃនាថ្ងៃទី ០៦ ខែ មករា ឆ្នាំ២០១៤ - «កម្មវិធីស្ថាបនាភាពជាដៃគូដើម្បីបរិយាកាសទំនាក់ទំនងបែបច្នៃប្រឌិត» (SPICE) ដែលជាគម្រោងមួយផ្ដល់ថវិកាដោយទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្តរជាតិ (USAID) ត្រូវបានជាប់រង្វាន់ក្នុងការប្រកួត «រង្វាន់ប្រើទូរស័ព្ទចល័តជាដំណោះស្រាយសម្រាប់ការអភិវឌ្ឍក្នុងតំបន់អាស៊ី» នៅក្នុងកម្មវិធីវេទិកាប្រើទូរស័ព្ទជាដំណោះស្រាយដែលប្រារព្ធឡើងនៅទីក្រុងបាងកក ប្រទេសថៃកាលទីថ្ងៃទី ៦ ខែ មករា ឆ្នាំ២០១៤។ អង្គការវិទ្យាស្ថានបើកទូលាយ គឺជាអង្គការមិនមែនរដ្ឋាភិបាលក្នុងស្រុកដែលអនុវត្តកម្មវិធី SPICE ក្នុងប្រទេសកម្ពុជា។ លោក ហាបៀរ សូឡា (Javier Sola) ជានាយកកម្មវិធី SPICE បានទទួលពានរង្វាន់នេះក្នុងនាមកម្មវិធី។

USAID RDMA Director Michael Yates (center) with Mobile Solutions M4D Contest Award Winners Javier Sola of the Open Institute, first place (right)

នាយកបេសកកម្ម USAID ប្រចាំតំបន់អាស៊ីលោក Michael Yates (នៅកណ្ដាល) ក្នុងចំណោមអ្នកឈ្នះរង្វាន់ ការប្រើទូរស័ព្ទជាដំណោះស្រាយ និងលោក Javier Sola មកពីអង្គការវិទ្យាស្ថានបើកទូលាយ (ស្ដាំ)

តាមរយៈកម្មវិធី SPICE អង្គការវិទ្យាស្ថានបើកទូលាយជួយអង្គការសង្គមស៊ីវិលកម្ពុជាអភិវឌ្ឍសេវាព័ត៌មានដោយប្រើប្រព័ន្ធឆ្លើយតបជាសំឡេង (IVR) ដែលប្រព័ន្ធនេះអនុញ្ញាតឲ្យពួកគេផ្ដល់ព័ត៌មាន និងសេវាកម្មផ្សេងៗដើម្បីលើកកម្ពស់ជីវភាពរស់នៅនៃអ្នកទទួលផលរបស់ពួកគេតាមរយៈទូរស័ព្ទចល័ត។ ប្រព័ន្ធ ឆ្លើយតបជាសំឡេង (IVR) ជាបច្ចេកវិទ្យាដែលបានបង្កើតឡើងយ៉ាងល្អនៅក្នុងបណ្ដាប្រទេសលោកខាងលិចដែលគេបានប្រើប្រាស់ ដើម្បីឆ្លើយតបតាមទូរស័ព្ទនូវសារព័ត៌មានដែលបានថតទុកជាមុន។ កម្មវិធី SPICE គឺជាកម្មវិធីដំបូងមួយដែលដាក់ឲ្យប្រើប្រាស់បច្ចេកវិទ្យាខ្នាតធំបែបនេះសម្រាប់ការអភិវឌ្ឍ ។

ប្រព័ន្ធនេះមានអ្នកប្រើប្រាស់ជាច្រើនរួចហើយនៅក្នុងប្រទេសកម្ពុជា។ សេវាដែលប្រើប្រព័ន្ធនេះបានអភិវឌ្ឍឡើងដើម្បីជូនដំណឹងអ្នកបោះឆ្នោតកម្ពុជាអំពីទីកន្លែង និងវិធីបោះឆ្នោតក្នុងអំឡុងពេលបោះឆ្នោតជ្រើសរើសតំណាងរាស្ត្រនីតិកាលទី ៥ ឆ្នាំ ២០១៣ ដែលត្រូវបានប្រើប្រាស់ដោយមនុស្សជាង ៦០០.០០០ នាក់។ សេវាមួយទៀតកំពុងត្រូវបានប្រើប្រាស់ដើម្បីកាត់បន្ថយអត្រាមរណភាពទារកតាមរយៈការជូនដំណឹងម្ដាយអំពីគ្រោះថ្នាក់ដែលអាចកើតឡើងក្នុងអំឡុងខែទីមួយនៃទារកដែលទើបកើតថ្មីរបស់ពួកគេ។ នៅមានសេវាមួយផ្សេងទៀតផងដែរដែលត្រូវបានរៀបចំឡើងជាប្រព័ន្ធជូនដំណឹងជាមុនសម្រាប់កសិករដែលប្រឈមនឹងគ្រោះមហន្តរាយធម្មជាតិ។ អង្គការពលកម្មអន្តរជាតិ (ILO) ប្រើប្រាស់ប្រព័ន្ធនេះ ដើម្បីជូនដំណឹងកម្មកររោងចក្រកាត់ដេរកម្ពុជាអំពីសិទ្ធិស្របច្បាប់របស់ពួកគេ។ សេវាជាច្រើនទៀតកំពុងត្រូវបានអភិវឌ្ឍឡើងដែលនឹងជួយអប់រំកម្មករអន្តោប្រវេសន៍ធ្វើការតាមផ្ទះអំពីហានិភ័យផ្សេងៗ និងឱកាសក្នុងការធ្វើអន្តោប្រវេសន៍។

នៅក្នុងពិធីប្រគល់ពានរង្វាន់ លោក ហាបៀរ សូឡា (Javier Sola) បានប្រកាសថារង្វាន់នឹងត្រូវបានប្រើប្រាស់ ដើម្បីជួយក្រុមជនជាតិភាគតិចដែលមិនមានភាសាសរសេរឲ្យស្ដាប់ដើម្បីស្វែងយល់ច្បាប់ភូមិបាលជាភាសាកំណើតរបស់ពួកគេ។ តាមរយៈការបង្កើតសេវាដែលអនុញ្ញាតឲ្យពួកគេស្ដាប់អំពីច្បាប់ និងការពន្យល់ ពួកគេនឹងអាចយល់កាន់តែច្បាស់អំពីសិទ្ធិជាម្ចាស់កម្មសិទ្ធិលើដីធ្លីរបស់ពួកគេ។

នាយកកម្មវិធីប្រើទូរស័ព្ទជាដំណោះស្រាយនៅ USAID អ្នកនាង Priya Jaisinghai បានកត់សម្គាល់ថា «វាមានតម្លៃខ្លាំងណាស់ក្នុងការអភិវឌ្ឍហេដ្ឋារចនាសម្ព័ន្ធបច្ចេកវិទ្យារួមមួយដែលអាចត្រូវបានប្រើប្រាស់ដោយគម្រោងរបស់ USAID លើវិស័យខុសៗគ្នា។ ដោយសារតែកម្មវិធី SPICE អង្គការសង្គមស៊ីវិលក្នុងប្រទេសកម្ពុជាបានចូលប្រើប្រាស់ធនធានដែលមានជំនាញខ្ពស់ ដោយមិនចាំបាច់អភិវឌ្ឍហេដ្ឋារចនាសម្ព័ន្ធ និងជំនាញបច្ចេកវិទ្យានៅនឹងកន្លែង។ នេះគឺជាគំរូដ៏មានអានុភាពយ៉ាងធំធេង និងជាពានរង្វាន់ដែលស័ក្ដិសមនឹងទទួលបានជាទីបំផុត។»