វគ្គបណ្ដុះបណ្ដាលស្ដីពីគណនេយ្យភាពសង្គម

វគ្គបណ្ដុះបណ្ដាលស្ដីពីគណនេយ្យភាពសង្គមបានរៀបចំឡើងនៅថ្ងៃទី ១៦-១៧ ខែ តុលា ឆ្នាំ ២០១៣ នៅអង្គការវិទ្យាស្ថានបើកទូលាយ ។ គោលបំណងនៃវគ្គបណ្ដុះបណ្ដាលនេះ គឺធ្វើឡើងដើម្បីកសាងសមត្ថភាព និងភាពជឿជាក់ដល់ប្រជាពលរដ្ឋសាមញ្ញ ជាពិសេសយុវជន និងក្រុមប្រឹក្សាឃុំ/សង្កាត់ដែលជាក្រុមគោលដៅរបស់អង្គការវិទ្យាស្ថានបើកទូលាយ ។

បន្ថែមពីនេះទៀត អង្គការវិទ្យាស្ថានបើកទូលាយមានបំណងចង់អប់រំក្រុមទាំងនេះអំពីធាតុសំខាន់ៗនៃគណនេយ្យភាព សង្គមនៅប្រទេសកម្ពុជា ដើម្បីបង្កើនគណនេយ្យភាព ជាសាធារណៈ ធ្វើឲ្យប្រទេសកម្ពុជាអនុវត្តអភិបាលកិច្ចបានល្អដោយប្រសិទ្ធភាព ការផ្ដល់សេវាកម្មសាធារណៈបានប្រសើរ មានការអភិវឌ្ឍជានិរន្ត និងការផ្ដល់ភាពអង់អាចដល់ប្រជាពលរដ្ឋ ។ គណនេយ្យភាព សង្គម គឺជាយន្តការយ៉ាងសំខាន់ដែលប្រជាពលរដ្ឋ សហគមន៍ ប្រព័ន្ធផ្សព្វផ្សាយឯករាជ អង្គការសង្គមស៊ីវិល និងមន្ត្រីសាធារណៈអាចប្រើប្រាស់ដើម្បីអនុវត្តគណនីភាពសម្រាប់សកម្មភាពរបស់ពួកគេ ។ ការប្រើប្រាស់គណនេយ្យភាពសង្គមអាចបង្កើនប្រសិទ្ធភាពសង្គមរបស់យើងធ្វើឲ្យសេវា សាធារណៈបម្រើដល់របស់ប្រជាពលរដ្ឋបានកាន់តែប្រសើរ និងបង្កើនការផ្ដល់ភាពអង់អាចដល់ប្រជាពលរដ្ឋរបស់យើងបានផងដែរ ។

អ្នកចូលរួមនៅក្នុងវគ្គបណ្ដុះបណ្ដាលនេះ គឺជាក្រុមប្រឹក្សាមកពីរាជធានី និងខេត្ត ដូចជា ភ្នំពេញ បាត់ដំបង សៀមរាប និងខេត្តកណ្ដាល ព្រមទាំងមាននិស្សិតមកពីសាកលវិទ្យាល័យ យុវជនមកពីសមាគមអភិវឌ្ឍសុខភាពប្រជាជន (PHD) និងអ្នកចូលរួមមកពីបណ្ដាញអង្គការយុវជនខ្មែរ និង ការអភិវឌ្ឍសង្គម (KYSD) ។

លោកស្រី ជឹម ម៉ាណាវី នាយិកាប្រតិបត្តិនៃអង្គការវិទ្យាស្ថានបើកទូលាយ បានផ្ដល់សន្ទរកថាស្វាគមន៍ដល់អ្នកចូលរួមក្នុងវគ្គបណ្ដុះបណ្ដាលអំពី គណនេយ្យភាពសង្គម នៅថ្ងៃទី ១៦ តុលា ២០១៣ ។ រូបថតដោយ វិទ្យាស្ថានបើកទូលាយនៅក្នុងសន្ទរកថាស្វាគមន៍ដល់អ្នកចូលរួម លោកស្រី ជឹម ម៉ាណាវី នាយិកាប្រតិបត្តិនៃអង្គការវិទ្យាស្ថានបើកទូលាយ បានពន្យល់ថា នេះជាវគ្គបណ្ដុះបណ្ដាលលើកទីមួយអំពីគណនេយ្យភាពសង្គម ដែលបានធ្វើឡើងនៅអង្គការវិទ្យាស្ថានបើកទូលាយ ។ លោកស្រី ក៏បានមានប្រសាសន៍សង្ខេបផងដែរ អំពីអត្ថន័យពេញលេញនៃគណនេយ្យភាពសង្គម ដោយសំដៅលើភារកិច្ចរបស់ប្រជាពលរដ្ឋ និងអាជ្ញាធរក្នុងការទទួលខុសត្រូវធានាឲ្យបាននូវគណនេយ្យភាពសង្គម ។ ដើម្បីសម្រេចបានគោលដៅនេះត្រូវតែមានការចូលរួមពីប្រជាពលរដ្ឋសាមញ្ញ និងអង្គការសង្គមស៊ីវិល ទាំងផ្ទាល់ និងមិនផ្ទាល់ ដើម្បីធានាឲ្យបានគណនេយ្យភាព សង្គមយ៉ាងពិតប្រាកដនៅក្នុងប្រទេសកម្ពុជា ។

លោកស្រី Kasumi Nakagawa អនុប្រធានក្រុមប្រឹក្សាភិបាលនៃអង្គការវិទ្យាស្ថានបើកទូលាយ បានផ្ដល់សន្ទរកថាក្នុងពេលបើកវគ្គ កាលពី ថ្ងៃ ទី ១៦ តុលា ២០១៣។ រូបថតដោយ វិទ្យាស្ថានបើកទូលាយនៅក្នុងសន្ទរកថាបើកវគ្គ លោកស្រី Kasumi Nakagawa អនុប្រធានក្រុមប្រឹក្សាភិបាលនៃអង្គការវិទ្យាស្ថានបើកទូលាយ បានមានប្រសាសន៍ថា លោកស្រីពិតជាមានសេចក្ដីសោមនស្សរីករាយយ៉ាងខ្លាំងនៅក្នុងកិច្ចសន្ទនាបើកវគ្គបណ្ដុះបណ្ដាលស្ដីពីគណនេយ្យភាពសង្គមនេះ។ ទោះបីនេះជាលើកដំបូង ដែលព្រឹត្តិការនេះបានធ្វើឡើងនៅអង្គការវិទ្យាស្ថានបើកទូលាយក៏ដោយ ពីមុនៗមក អង្គការវិទ្យាស្ថានបើកទូលាយ បានសហការជាមួយក្រុមប្រឹក្សាជាតិឃុំ/សង្កាត់ (NLC/S) រៀបចំវគ្គបណ្ដុះបណ្ដាលជាច្រើននៅរាជធានីភ្នំពេញ ។ លោកស្រីក៏បន្តទៀតថា លោកស្រីបាននិយាយជាមួយលោក ឈាវ ណាក់ ទីប្រឹក្សានៃគម្រោងអភិបាលកិច្ចល្អមូលដ្ឋាន (DFGG) នៃក្រសួងមហាផ្ទៃ ដែលជាអ្នកបណ្ដុះបណ្ដាល ហើយបានដឹងថា គម្រោងអភិបាលកិច្ចល្អមូលដ្ឋានបានព្យាយាមស្វែងរកដៃគូបណ្ដាញ ដើម្បីពួកគេអាចបន្តជួយគាំទ្រអង្គការវិទ្យាស្ថានបើកទូលាយ និងផ្ដល់វគ្គបណ្ដុះបណ្ដាលអំពីគណនេយ្យភាព សង្គមដល់បណ្ដាខេត្តផ្សេងៗ ដើម្បីបង្កើនចំណេះដឹងរបស់ក្រុមប្រឹក្សាឃុំ/សង្កាត់ អំពីអភិបាលកិច្ចល្អនៅប្រទេសកម្ពុជា និងលើកកម្ពស់អភិបាលកិច្ចល្អ ដើម្បីជួយប្រជាពលរដ្ឋឲ្យទទួលបាននូវសេវាកម្មសាធារណៈយ៉ាងប្រសើរ ។ លោកស្រី Kasumi Nakagawa បានបន្តទៀតដោយពន្យល់ថា វគ្គបណ្ដុះបណ្ដាលនេះ ត្រូវបានរៀបចំឡើងសម្រាប់ក្រុមប្រឹក្សាឃុំ/សង្កាត់ និងនិស្សិតសាកលវិទ្យាល័យ ពីព្រោះពួកគេជាក្រុមគោលដៅនៃគម្រោង"លើកកម្ពស់ការចូលរួមរបស់យុវជនក្នុងការអភិវឌ្ឍតាមរយៈការប្រើប្រាស់ ICT” ។ បន្ទាប់ពីទទួលបានការបណ្ដុះបណ្ដាលអំពីគណនេយ្យភាពសង្គមរួចហើយ ក្រុមប្រឹក្សាឃុំ/សង្កាត់ អង្គការក្រៅរដ្ឋាភិបាល និងរដ្ឋាភិបាលបានចាប់ផ្ដើមផ្សព្វផ្សាយព័ត៌មានអំពីគណនេយ្យភាពសង្គមដល់ឃុំទាំងអស់ទោះជាយ៉ាងណាក៏ដោយ ដោយសារភាពខ្វះខាតការអប់រំ និងព័ត៌មានអំពីប្រធានបទនេះ ការផ្សព្វផ្សាយព័ត៌មាននេះអាចធ្វើទៅបានមានកម្រិត។ ទោះបី យុវជនជាក្រុមដែលសំខាន់ក្នុងការលើកកម្ពស់គណនេយ្យភាពសង្គម និងការអភិវឌ្ឍប្រទេសឲ្យមានប្រសិទ្ធភាពក៏ដោយ ពួកគេនៅតែមិនមានការយល់ដឹងពេញលេញអំពីគោលគំនិតនៃគណនេយ្យភាព សង្គម ។ អាស្រ័យហេតុនេះហើយទើប អង្គការវិទ្យាស្ថានបើកទូលាយនាំយកប្រធានបទអំពីគណនេយ្យភាព សង្គមមកធ្វើការបណ្ដុះបណ្ដាលដល់ក្រុមប្រឹក្សាឃុំ/សង្កាត់ និងនិស្សិតសាកលវិទ្យាល័យ ដើម្បីចែករំលែកចំណេះដឹង និងបទពិសោធន៍ដល់អ្នកផ្សេងទៀត ។ នៅចុងបញ្ចប់នៃសន្ទរកថា លោកស្រី Kasumi Nakagawa បានថ្លែងអំណរគុណដល់សម្ពន្ធភាពជាតិឃុំ/សង្កាត់ សមាជិកក្រុមប្រឹក្សាឃុំ/សង្កាត់ ដែលបានជួយគាំទ្រ និងសហការជានិច្ចជាមួយអង្គការវិទ្យាស្ថានបើកទូលាយ ។ លោកស្រីក៏បានថ្លែងអំណរគុណដល់ដៃគូអង្គការសង្គមស៊ីវិលដែលរួមមាន KYSD និង PHD ដែលបានអញ្ជើញនិស្សិតសាកលវិទ្យាល័យមកចូលរួមជាមួយគម្រោងនេះ។

នៅក្នុងសន្ទរកថាស្វាគមន៍ លោក ឈាវ ណាក់ ទីប្រឹក្សាគម្រោងអភិបាលកិច្ចល្អមូលដ្ឋាននៃក្រសួងមហាផ្ទៃ ពីឆ្នាំ ២០០៨ ដល់ ២០០៩ – បានពន្យល់ថា វគ្គបណ្ដុះបណ្ដាលអំពីគណនេយ្យភាពសង្គមបានធ្វើឡើងបីដងរួចមកហើយ ដែលមានអ្នកចូលរួមចំនួន ៣០០០ នាក់នៅក្នុងវគ្គទាំងនេះ។ វាគ្មិនដ៏ជំនាញមកពីបរទេសដូចជា ហ្វីលីពីន ឥណ្ឌូណេស៊ី ។ល។ បានធ្វើការសម្របសម្រួលវគ្គបណ្ដុះបណ្ដាលទាំងនោះ។ លោក ឈាវ ណាក់ បានបន្តទៀតដោយមានប្រសាសន៍ថា យុវជនមានតួនាទីយ៉ាងសំខាន់នៅក្នុងសង្គម ធ្វើឲ្យមានការផ្លាស់ប្ដូរសេដ្ឋកិច្ច និងនយោបាយរបស់ប្រទេសជាតិ ។

រូបភាពលម្អ 1៖រូបភាពសកម្មភាពវគ្គបណ្ដុះបណ្ដាល ដោយលោក ឈីវ ណាក់ ទីប្រឹក្សាគម្រោងអភិបាលកិច្ចល្អមូលដ្ឋាននៃក្រសួងមហាផ្ទៃវគ្គបណ្ដុះបណ្ដាលនេះបានធ្វើឡើងរយៈពេលពីរថ្ងៃ ដែលមានប្រធានបទចំនួន ៩ ដូចជា (១) គោលគំនិតនៃអភិបាលកិច្ចល្អ គណនេយ្យភាពសង្គម និងការអភិវឌ្ឍលទ្ធិប្រជាធិបតេយ្យ (២) បទពិសោធន៍ និងការអនុវត្តលទ្ធិប្រជាធិបតេយ្យនៅកម្ពុជា ជាពិសេសបទពិសោធន៍ពីប្រទេសផ្សេងៗ (៣) បន្ទាត់រចនាសម្ព័ន្ធ និងគណនេយ្យភាព នៃអាជ្ញាធរមូលដ្ឋាននៅកម្រិតថ្នាក់ក្រោមជាតិ (៤) តួនាទី សិទ្ធិ និងការទទួលខុសត្រូវរបស់ប្រជាពលរដ្ឋ និងអង្គការសង្គមស៊ីវិលក្នុងការលើកកម្ពស់អភិបាលកិច្ចល្អ និង គណនេយ្យភាពសង្គម (៥) ទំនាក់ទំនងរវាងក្រុមប្រឹក្សាក្រុង/ស្រុក ឃុំ/សង្កាត់ និងប្រជាពលរដ្ឋ (៦) ការចូលរួមរបស់ប្រជាពលរដ្ឋក្នុងការរៀបចំផែនការ និងថវិកា អង្គការវេទិកាសាធារណៈ ប្រើប្រាស់ករណីសិក្សាជាវីដេអូសម្រាប់គោលបំណងសិក្សារៀនសូត្រ (៩) ការចូលរួមរបស់ប្រជាពលរដ្ឋក្នុងដំណើរការប្រជុំឃុំ/សង្កាត់ប្រចាំខែ។

កញ្ញា ហម ស្រីនិច និស្សិតសាកលវិទ្យាល័យកម្ពុជា និងអ្នកស្ម័គ្រចិត្តនៃ KYSD បានលើកឡើងថា វគ្គបណ្ដុះបណ្ដាលនេះបានផ្ដល់នូវសារប្រយោជន៍ជាច្រើន ពីព្រោះ KYSD បានផ្ដល់ឱកាសឲ្យនាងចូលរួមដើម្បីទទួលបានចំណេះដឹងដែលទាក់ទងនឹងសង្គម ។ នាងក៏ទទួលបានការយល់ដឹងជាច្រើនអំពីប្រធានបទ និងចំណុចសំខាន់ៗពីអ្នកសម្របសម្រួលដែលមានដូចជា គណនេយ្យភាពសង្គម ទំនាក់ទំនងរវាងក្រុមប្រឹក្សាក្រុង/ស្រុក ឃុំ/សង្កាត់ និងប្រជាពលរដ្ឋផងដែរ ។ មុនពេលចាប់ផ្ដើមវគ្គបណ្ដុះបណ្ដាល នាងមិនបានគិតថា ប្រជាពលរដ្ឋធ្វើការយ៉ាងជិតស្និទ្ធជាមួយអាជ្ញាធរមូលដ្ឋានទេ ប៉ុន្តែបន្ទាប់ពីបានចូលរួមវគ្គនេះ នាងបានយល់ដឹងអំពីទំនាក់ទំនង និងតួនាទីយ៉ាងសំខាន់របស់នាង រវាងប្រជាពលរដ្ឋ និងអាជ្ញាធរ ៖ ប្រជាពលរដ្ឋដើរតួនាទីជាអ្នកមានតម្រូវការ ហើយរដ្ឋាភិបាលដើរតួនាទីជាអ្នកផ្គត់ផ្គង់សេវាកម្ម ដូច្នេះ វាហាក់បីដូចជាក្រុមដែលខុសគ្នានេះ ធ្វើការរួមគ្នាយ៉ាងជិតស្និទ្ធ។ ស្ត្រីវ័យក្មេងម្នាក់នេះ បានលើកឡើងថា នាងនឹងចែករំលែកចំណេះដឹងថ្មីៗរបស់នាងដែលទទួលបានពីវគ្គបណ្ដុះបណ្ដាលនេះជាមួយក្រុមគ្រួសារ និងមិត្តភ័ក្ដិរបស់នាង។ នាងក៏បានស្នើផងដែរថា ពួកគេគួរតែផ្ដល់វគ្គបណ្ដុះបណ្ដាលបន្ថែមទៀត ដើម្បីកសាងសមត្ថភាព និងផ្ដល់គំនិតច្នៃប្រឌិតថ្មីសម្រាប់ប្រជាជននៅកម្ពុជា។

លោក នៅ ប៊ុន ក្រុមប្រឹក្សាសង្កាត់អូរឫស្សី ១ បានមានប្រសាសន៍ថា លោកបានសិក្សាមេរៀនដែលទាក់ទងនឹងប្រធានបទនេះផងដែរ។ អំឡុងពេលវគ្គបណ្ដុះបណ្ដាលរយៈពេល ២ ថ្ងៃនេះ លោកទទួលបានការយល់ដឹងច្រើនអំពីតួនាទី សិទ្ធិ និងការទទួលខុសត្រូវរបស់ប្រជាពលរដ្ឋ និងអង្គការសង្គមស៊ីវិលក្នុងការលើកកម្ពស់អភិបាលកិច្ចល្អ និងគណនេយ្យភាពសង្គម ព្រមទាំងអង្គការវេទិកាសាធារណៈប្រើប្រាស់ករណីសិក្សាជាវីដេអូសម្រាប់គោលបំណងសិក្សា។ កាលពីមុន យើងមិនដែលបានប្រើករណីសិក្សាជាវីដេអូបែបនេះ ប៉ុន្តែឆ្នាំនេះ យើងចាប់ផ្ដើមប្រើប្រាស់វាដើម្បីផ្ដល់ឱកាសសម្រាប់អ្នកដែលមិនពេញចិត្តនឹងកម្រិតជីវភាពរស់នៅរបស់ពួកគេ ដើម្បីពិពណ៌នាអំពីបញ្ហារបស់ពួកគេដើម្បីស្វែងរកដំណោះស្រាយ។ លោក នៅ ប៊ុន បានស្នើថា រដ្ឋាភិបាលគួរផ្ដល់វគ្គបណ្ដុះបណ្ដាលបន្ថែមទៀតដែលទាក់ទងនឹងអភិបាលកិច្ចល្អ និងគណនេយ្យភាពសង្គម ដើម្បីកសាងសមត្ថភាពរបស់ប្រជាពលរដ្ឋ កាន់តែច្រើនតាមដែលអាចធ្វើទៅបាន។

វគ្គបណ្ដុះបណ្ដាលនោះបានផ្ដល់ការយល់ដឹងយ៉ាងច្រើនដល់អ្នកចូលរួម និងបានអនុញ្ញាតឲ្យនិស្សិតសាកលវិទ្យាល័យ និងក្រុមប្រឹក្សាឃុំ/សង្កាត់ ធ្វើការចែករំលែកគំនិតយោបល់អំពីមេរៀនដែលពួកគេបានរៀន និងបទពិសោធន៍របស់ពួកគេផងដែរ។ ក្រៅពីនេះ ពួកគេបានបង្កើតទំនាក់ទំនងជិតស្និទ្ធ បានសហការល្អប្រសើរជាមួយគ្នា និងធ្វើជាគំរូល្អដើម្បីឲ្យអ្នកផ្សេងអនុវត្តតាម។ ដូច្នេះ វគ្គបណ្ដុះបណ្ដាលនេះបានបញ្ចប់យ៉ាងរលូន និងដោយជោគជ័យបំផុត។ អ្នកចូលរួមស្ទើរតែទាំងអស់មានការកោតសរសើរយ៉ាងខ្លាំង និងចង់ចូលរួមវគ្គបណ្ដុះបណ្ដាលនេះនៅថ្ងៃអនាគត។

លោក ឈីវ ណាក់ ទីប្រឹក្សា DFGG នៃក្រសួងមហាផ្ទៃ បានផ្ដល់និយមន័យអំពីគណនីភាពសង្គម កាលបរិច្ឆេទ : ១៧ តុលា ២០១៣ រូបភាពដោយ វិទ្យាស្ថានបើកទូលាយ	លោក នៅ ប៊ុន ក្រុមប្រឹក្សាសង្កាត់អូរឫស្សី ១ បានសម្ដែងអំពីអារម្មណ៍របស់គាត់ និងប្រាប់ពីអ្វីដែលគាត់ទទួលបានក្នុងវគ្គបណ្ដុះបណ្ដាលនេះ កាលបរិច្ឆេទ : ១៧ តុលា ២០១៣ រូបភាពដោយវិទ្យាស្ថាន
កញ្ញា ហម ស្រីនិច និស្សិតសាកលវិទ្យាល័យកម្ពុជា បានលើកឡើងអំពីសារសំខាន់នៃវគ្គបណ្ដុះបណ្ដាលនេះ។ កាលបរិច្ឆេទ : ១៧ តុលា ២០១៣ រូបភាពដោយវិទ្យាស្ថានបើកទូលាយ	រូបភាពរួមរបស់សិក្ខាកាមនៅក្នុងវគ្គបណ្ដុះបណ្ដាលស្ដីពីមូលដ្ឋានគ្រឹះនៃគណនេយ្យភាពសង្គម អ្នកសម្របសម្រួលដោយ៖ លោក ឈាវ ណាក់ កាលបរិច្ឆេទ : ១៧ តុលា ២០១៣ រូបភាពដោយវិទ្យាស្ថានបើកទូលាយ
រូបភាពរួមរបស់សិក្ខាកាមនៅក្នុងវគ្គបណ្ដុះបណ្ដាលស្ដីពីមូលដ្ឋានគ្រឹះនៃគណនេយ្យភាពសង្គម អ្នកសម្របសម្រួលដោយ៖ លោក ឈាវ ណាក់ កាលបរិច្ឆេទ : ១៧ តុលា ២០១៣ រូបភាពដោយវិទ្យាស្ថានបើកទូលាយ	រូបភាពរួមរបស់សិក្ខាកាមនៅក្នុងវគ្គបណ្ដុះបណ្ដាលស្ដីពីមូលដ្ឋានគ្រឹះនៃគណនេយ្យភាពសង្គម អ្នកសម្របសម្រួលដោយ៖ លោក ឈាវ ណាក់ កាលបរិច្ឆេទ : ១៧ តុលា ២០១៣ រូបភាពដោយវិទ្យាស្ថានបើកទូលាយ